नेपाली जनसम्पर्क समिती युएईले धुमधामका साथ होलि मनायो (भिडियो सहित)

रामकुमार परियार

७ मार्च,युएई ।

शुक्रवार स्वदेशमा रंगहरुको पर्व होलि मनाईरहँदा प्रवासममा कार्यरत नेपाली हरुले समेत भरपुर मनोरञ्जनका साथ हंगामा मच्चाएका छन ।

युएईको नेपाली जनसम्पर्क समिती द्वारा आयोजित होलि विशेष सांगितिक कार्यक्रम मा सयौँ नेपाली एउटै थलोमा झुमेर धुमधामका साथ होलि हंगामा मच्चाएका हुन ।

युएईकै सुन्दर एवं हरित नगरी अल एनको सुपर रेस्टुरेन्टको कार्यक्रम हल भित्र आयोजित होलि विशेष सांगीतिक कार्यक्रम तथा वनभोज करिब ९ घण्टा पुर्ण  संगितमय बनेको थियो । दिउँसो एकबजेको शुरूवाती समय तय गरिएको भएता पनि टाढाका सहभागी आउन केही ढिला हुँदा करिब एक घण्टा ढिलागरि कार्यक्रम शुरु गरिएको थियो ।

दौराशुरुवाल र ढाकाटोपीमा ठाँटिएका कार्यक्रम प्रस्तोता बलराम बस्नेत र संगिता मोक्तानको स्टेजमा पदार्पण भए संगै दर्शक दिर्घाबाट हुटिङ बर्सिएको थियो ।  सुरुवातमा आयोजित छोटो औपचारिक कार्यक्रममा ईन्जिनियर राकेशकुमार जैशवालले सभातित्व ग्रहण गरेका थिए भने समितिका केन्द्रिय सभापति चित्र केसिको प्रमुख आतिथ्य रहेको थियो । यहाँ कार्यरत विभिन्न परोपकारी संघसंस्था का प्रतिनिधिहरुको आतिथ्य  ग्रहण पश्चात् प्रमुख अतिथिले मैनबत्ती बालेर कार्यक्रमको औपचारिक उद्घाटन गरेका थिए । चन्द्रसारु मगर,अजय मिश्र,धर्मराज सुवेदी,रामकृष्ण पुन लगायत अतिथिहरुले छोटो मन्तव्य समेत राखेका थिए ।

औपचारिक कार्यक्रमको समाप्ति संगै नेपाली झण्डा फर्फराउँदै राष्ट्रिय गान गाएर सांगीतिक कार्यक्रमको शुरूवात गरिएको थियो । हलमा सयौं थुङ्गा... गुन्जी रहँदा हरेकको छाती  गर्वले फुलेको अनुभूति सहजै गर्न सकिन्थियो । राष्ट्रगान सकिए लगत्तै कलाकार द्वय अनुराग थपलिया  र शोभा लामाले होलि रे...बोलको गितमा आकर्षक नृत्य पस्केर दर्शकलाई  होलिपर्वको यथार्थता अनुभुत गराए । यस लगत्तै मोडल तथा कलाकार मिनुषा लामाले किन बड्दैछ ढुकढुकी...बोलको गितमा स्वागत नृत्य  पस्किएकी थिईन । त्यसपछि स्टेज आएका अल एनका बहुमुखी कलाकार विवस ठकुरिको देश भक्त गितहरुको शिल्शिलेवार प्रस्तुतिले करिब ३० मिनेट दर्शकमा राष्ट्रप्रेम जगाएको थियो । चोर बिरालो पल्कियो...मा श्रजना भण्डारी र कृष्ण थापाको युगल नृत्यले दर्शकको निक्कै वाहिवाही पाउन सफल भयो । त्यसपछि नेपालीपन र राष्ट्रप्रेम झल्क्ने गितहरुमा शिलशिलेवार नृत्य पस्केर स्टेज तताउने विवस ठकुरी,शोभा लामा,अन्जली भट्टराई,नम्रता,मिनुषा,पुर्णिमा,अनिता,दिव्या आदिको नृत्यले दर्शकको निक्कै राम्रो साथ पाएको थियो ।

यसता आकर्षक नृत्यहरु को बिच बिचमा कार्यक्रम प्रस्तोता द्वयले समेत समय सापेक्ष विविध प्रसङ्गहरु जोडेर दर्शकलाई भरपुर मनोरञ्जन प्रदान गरे । कलाकार बलराम बस्नेतको समसमायिक राजनिती र सामाजिक बेथिति विरुद्धको व्यंग्य प्रहसनले दर्शक दिर्घामा हाँसोको बहार ल्याएको थिए । गायक विक्रम परियार,कमल कार्की,राजिव जंग,भुवन घिमिरे लगायतको गायन प्रस्तुतिले समेत दर्शकको निक्कै ताली बटुलेको थियो । अन्त्य तिर उध्रेको चोली... मा हट नृत्य पस्केर कलाकार जोत्सना प्रधानले हलको वातावरण नै गरमागरम बनाएकी थिईन ।

उक्त कार्यक्रम पुर्ण मनोरञ्जनात्मक हुँदा हुँदै पनि केही परोपकारी  कार्यहरु समेत भए । दुवै मृगौला खराब भएर जीवन मरणको दोसाँधमा छटपटी रहेका गुल्मिका ३० वर्षिय चन्द्र बहादुर मगरको उपचारमा सहयोगार्थ दर्शकहरुबाट सहयोग  संकलन गरिएको थियो । जसबाट संकलित १ हजार ३ सय २० दिराम मगरको उपचारार्थ सहयोग संकलन अभियानमा कृयाशिल जनसम्पर्क समितिका सभापति चित्र केसिलाई हस्तान्तरण गरिएको थियो । यसैगरी  कार्यक्रममा यहाँ कार्यरत सन्तान संग  बस्दै आउनु हुने ज्येष्ठ नागरिक ७७ वर्षिय खुमनाथ पाठक लाई समेत सम्मान पत्र सहित दोसल्ला ओढाएर सम्मान गरिएको थियो ।

उक्त कार्यक्रममा युएईको दुबई,अबुधाबी,फुजैरा,रास अल खेमा,अल एन लगायतका राज्यबाट करिब ५ सय नेपाली सहभागी  थिए । प्रवासमा बिरलै आयोजना गरिने यस्ता कार्यक्रमहरुमा सहभागी हुन पाउँदा आफुहरु ज्यादै खुसी भएको सहभागीहरुले प्रतिक्रिया दिएका छ्न । भने आयोजक नेपाली जनसम्पर्क समितीका केन्द्रिय सभापति चित्र केसिले समितिले नियमित रूपमा यस्ता कार्यक्रमहरु आयोजना गर्दै आएको र आगामी दिनमा समेत यस्ता कार्यक्रमलाई निरन्तरता दिँदै प्रवासि नेपाली हरु बिचको संबन्ध सुदृढ र आत्मिय बनाउदैँ लैजाने बताए ।

(भिडियो सामाग्री-प्रवासी अनलाईन,दुबई )